பலகல் நிலத்தைப் பறித்தாரே சீனர்;
சிலகல்லை மீட்டுச் சிரிக்க! -உலகில்
இனிநம்மைக் காக்க இறையாண்மைப் பூக்க
அணுவாற்றல் வேண்டும் அறி!
இருளில் கிடந்திழியும் இந்திய மண்ணின்
பொருளைப் பெருக்கிப் புதுக்கும் -அருளைப்
பணிவுந் தருமெனினும் பாரார் மதிக்க
அணுவாற்றல் வேண்டும் அறி
வல்லரசை வாழ்த்தும் வழக்கம் வளர்வதனால்
நல்லரசை ஏய்க்கும் நடைமுறையால் -உள்ளார்
அணுவாளக் கற்றவரென் றாவதனால் யார்க்கும்
அணுவாற்றல் வேண்டும் அறி!
அடிமை விலங்கை அணியாகச் சூடும்
மடிமை மடிதூங்கும் மக்கள் -விடிய
உணர்வாற்றல் ஓங்க உலகச் சமத்திற்(கு)
அணுவாற்றல் வேண்டும் அறி!
கல்லாதான் சொல்லும் கவியைச் சிலரவையில்
இல்லாப் பொருளேற்றும் இன்னுரையால் -பொல்லா
நிணச்செருக் குற்று நெறிமறப்பா ருய்ய
அணுவாற்றல் வேண்டும் அறி!
புதுமைப் புதுமையெனப் போக்கற் றிருள்வான்
பொதுமையைப் பூசிப் புரள்வார் -எதுமெய்?
கணித்தறியும் ஆற்றல் கலைவிளக் கேற்ற
அணுவாற்றல் வேண்டும் அறி!
பாத்தென்றல் முருகடியான்
இதற்கு குழுசேர்:
கருத்துரைகளை இடு (Atom)
கருத்துகள் இல்லை:
கருத்துரையிடுக